ՄԱՆՆԻՈՎ ՀԱԼՎԱ

        Գիտեմ, որ շատ եք հետաքրքրված հնդկական խոհանոցով, սակայն իմ ժամանակի սղության պատճառով չեմ  կարողանում հաճախակի գրել նյութեր: Ժամանակ առ ժամանակ պատրաստում եմ և հնդկական խոհանոցից, և այլ խոհանոցներից ուտեստեր, սակայն չեմ հասցնում կիսվել ձեզ հետ: 

       Հուսամ  շուտով կկարողանամ ձեզ հետ կիսվել իմ խոհարարական գաղտնիքներով և բաղադրատոմսերով, բայց մինչ ինձ հետ պատրաստելը, առաջարկում եմ հետևել Հասմիկի յութուբյան ալիքին:

Հասմիկը ապրում է Մումբայում, Հնդկաստանում: Այստեղ կարող եք կարդալ իմ հոդվածը Հասմիկի սիրո պատմության մասին: 

Հարսնացուն Էջմիածնից

   Հասմիկը վերջերս է բացել իր հայերեն լեզվով յութուբյան ալիքը, որտեղ ներկայացնում է հնդկական խոհանոցը:

       Եվ այսպես, այսօր Հասմիկի հետ միասին պատրաստում ենք  հնդկական  հալվա մաննիով:

      Շնորհակալություն Հասմիկ ջան հոլովակի համար:

      Եկեք գրանցվենք և Հասմիկի հետ միասին պատրաստենք համեղ ուտեստներ և քաղցրավենիքներ հնդկական հարուստ խոհանոցից:

                                               Հնդկական հալվա մաննիով

ՀԱՅԿԱԿԱՆ ՂԱՓԱՄԱՆ ՀՆԴԿԱՍՏԱՆՈՒՄ

       Հնդկաստանում հաճախ եմ պատրաստում  հայկական խոհանոցից ուտեստներ ու երեկ պատրաստել էի ղափամա: Ասեմ, որ շատ համեղ էր ստացվել և բոլորը հավանել են:

 Նկարները տեղադրելուց հետո շատերն են հարցրել բաղադրատոմսը:

 
             Կարևոր չէ, թե որտեղ ես ապրում, կարևորն այն է, որ կարողանաս պահպանել այն ինչ շատ հարազատ է և քոնն է:

       Այն պատրաստելու համար մեզ անհրաժեշտ է՝

• Դդում 1,5 կգ,
• Բրինձ 150 գր.,
• Կարագ 150գր.,
• Սալորի չիր 50գր.,
• Ծիրանի չիր 50գր.,
• Չամիչ 50գր.,
• Դարչին.,
• 1 Խնձոր,
• Մեղր 50 գր.,
• Ընկույզ 100 գր.:

Նայել վիդեոն՝ https://www.youtube.com/watch?v=G6jwDAgmHvU

           Բարի ախորժակ...

       Եկեք միասին լսենք մի շատ լավ հայկական երգ՝ Ղափամա

ԱՂԱՑԱԾ ՄՍՈՎ ԿԱՐԻ (KUTHU CURRY)

      Միասին պատրաստելու ենք հնդկական համեղ ուտեստների շարքից մի համեղ կարի՝կաղամբով և աղացած մսով: 

Kuthu curry

          Այս անգամ պարտաստելու ենք  աղացած մսով կարի: Կարին պատրաստելու ենք իմ լավ ընկեր Մարիի բաղադրատոմսով՝ ով մասնագիտությամբ դիզայներ է: Նա  մի քանի տարի է  ինչ  ապրում է Հնդկաստանի Մադրաս քաղաքում, ամուսնացած է և ունի շատ աշխույժ մի տղա: Տղայի անունը Առյուծ է, ուժեղ անուն է, չէ՞:

Սոխ, սխտոր, կոկոս, կոճապղպեղ և չաման

Կաղամբ

Աղացած միս /ցանկացած տեսակի/

Սոխ

Համեմունքներ

Լոլիկ

            Այս ճաշատեսակը պատրաստելու համար մեզ անհրաժեշտ է.

• 0,5 կգ. աղացած միս,
• 400 գր. կաղամբ,
• 2 լոլիկ,
• 4 գլուխ սոխ,
• 4 պճեղ սխտոր,
• կոճապղպեղ(ginger),
• կոկոս,
• 2 ճ/գ ձեթ:

 
      Համեմունքներ.

• կալպասի ծաղիկ,
• երկու հատիկ կանաչ հիլ,
• մեխակ, 
• դարչին,
• դափնու տերև,
• 1ճ/գ. չաման
• 2 թ/գ. համեմի սերմ,
• 1թ/գ. կծու կարմիր բիբար
• աղ

           Պատրաստման եղանակը  իմանալու համար նայել  վիդեոն, որտեղ Մարին մանրամասն ցույց է տալիս թե ինչպես պատրաստել  այն:

           Բարի ախորժակ:

Շնորհակալություն Մարիին մեզ հետ իր փորձով կիսվելու համար:

ԿԱՆԱՉ ՀԻԼ (GREEN CARDAMOM)

       

         Հիլ, կարդամոմ կամ կարդամոն աճում է Հարավային Հնդկաստանի լեռնային խոնավ անտառներում, մշակվում է նաև Շրի Լանկայում, Հնդկաչինում և Հարավային Չինաստանում: 

Կանաչ հիլ (green cardamom)

     Արմատներով գալիս է այն Հնդկաստանից և Նեպալից: Լինում են կանաչ և մուգ շագանակագույն: Կանաչ հիլն ամենատարածվածն է աշխարհում: Այն ունի անուշ հոտ և յուրօրինակ սուր համ:

   Տերևները նշտարաձև են՝ երկշարք դասավորված վեգետատիվ ընձյուղի վրա: Ծաղիկները բաց կանաչավուն են՝ հուրանում հավաքված: Պտուղը եռաբուն տուփիկ է: Սերմերը մանր են, գորշ կարմրավուն, կնճռոտված, անկանոն ձևի, հոտավետ և որպես համեմունք օգտագործվում է խոհարարության մեջ: Սերմերում պարունակվող եթերային յուղը (3,5-7%)կիրառվում է սննդի, ծխախոտի արտադրության և բժշկության մեջ:

    Այս համեմունքը աշխարհի 3-րդ ամենաթանկ համեմունքն է՝ զաֆրանից և վանիլից հետո: 

   Հիլը հատիկ վիճակում օգտագործում են թեյի, բրնձի և մի շարք արևելյան քաղցրավենիքների, իսկ աղացած վիճակում՝ հնդկական տարբեր մասալաների պատրաստման մեջ: Այն կազմում է համեմունքների տարբեր խառնուրդների անբաժան մասնիկը:

    Հիլն Հարավային Ասիայում մինչև օրս օգտագործվում է  որպես ավանդական դեղամիջոց ատամների ու լնդերի բորբոքման, ստամոքսի հիվանդությունների, մարսողական խնդիրների և երիկամներից քարերի հեռացման համար: Այն համարվում է նաև հակաթույն՝ օձերի և կարիճների խայթոցների դեմ :

ՀԱՎԻ ԿԱՐԻ (CHICKEN CURRY)

       Այսօր միասին պատրաստելու ենք հնդկական մի շատ համեղ ճաշատեսակ՝  հավի կարիի /chicken curry/: Հավի մսով ու համեմունքներով ուտեստ: Այն այսօր պատրաստելու ենք իմ շատ լավ ընկեր՝ Լիաննա Բեգլարյանի բաղադրատոմսով: Ի դեպ՝ Լիաննան  մասնագիտությամբ կենսաբան է, ամուսնացած է, և այժմ ապրում է Դելիում:

        Եվ այսպես հավի կարին պատրաստելու համար մեզ անհրաժեշտ է՝

• 1 կգ. հավի միս,
• 3-4 հատ միջին չափի սոխ,
• 3 հատ փոքր լոլիկ,
• 5-6 պճեղ սխտոր /ըստ ճաշակի/,
• կոճապղպեղ /իմբիր/, կամ փոշին 0,5թ/գ.,
•  1 ճ/գ. "կարի մասալա" /curry masala/, /Masala-հնդկերեն նշանակում է համեմունքների փունջ/,
•  3-4  ճ/գ. ձեթ:

        Կարի մասալայի համար մեզ անհրաժեշտ է՝

• 2 ճ/գ. համեմի սերմի փոշի, 
• 1,5 ճ/գ., կարմիր պղպեղ,
• 0,5 թ/գ. քրքում /turmeric/,
• 0,5 թ/գ.  սև պղպեղ,
•  "գարամ մասալա" /garam masala/ շատ քիչ, 0,25թ/գ:

     "Գարամ մասալան" համեմունքների փունջ է, որն իր մեջ ներառում է 8-12 տեսակի համեմունք: Հաջորդ նյութերում կներկայացնեմ, թե ինչպես պատրաստել "գարամ մասալա": Կարծում եմ հայկական քիմքին հաճելի է առանց "գարամ մասալայի", ամեն դեպքում ես կգրեմ "գարամ մասալա" պատրաստելու եղանակը:

        Միսը մի քանի ժամ առաջ  դնում ենք աղաջրի մեջ: 

     Հավի կարին պատրաստելու համար ձեթը լցնում ենք թավայի մեջ և թողնում, որ լավ տաքանա: Մի քանի րոպե հետո ավելացնում ենք նախօրոք մանր կտրտված սոխը և թողնում այնքան ժամանակ, որ ստանա վարդագույն երանգ: 

Սոխ

      Սոխը վարդագույն երանգ ստանալուց հետո ավելացնում ենք մանր կտրտված լոլիկը և թուլացնում ենք կրակը:

Լոլիկ

 Բերանը փակում ենք, բայց ժամանակ առ ժամանակ խառնում ենք, որ չվառվի:

      Եթե զգում եք ջրային մասը քիչ է, ապա ավելացրեք շատ քիչ ջուր:

 Եփում ենք 10 րոպե, այնուհետև ավելացնում ենք աղ ըստ ճաշակի ու կարի մասալա: Մի քանի րոպե եփելուց հետո ավելացնում ենք հավի մսի կտորները, փակում ենք բերանը, թուլացնում ենք կրակն ու շարունակում եփել: Եփում ենք մոտ կես ժամ:

      Ժամանակ առ ժամանակ խառնում ենք, որ չկպնի տակը: Երբ ձեթը առանձնանում է, նշանակում է եփել է: Անջատում ենք կրակը, և ըստ ցանկության ավելացնում ենք համեմ:

Հավի կարի /chicken curry/

    Բարի ախորժակ

    Շնորհակալություն Լիաննային իր փորձով մեզ հետ կիսվելու համար:

ՉԱՄԱՆ (CUMIN)

         
         Չաման ( քիմոն կամ քիմիոն, քեմոն, զիրե, ճապուռ)

Չաման

       Գիտական անվանումն է՝ carus carve: Սերմերը գտնվել են Ք.Ա.3-րդ հազարամյակում կառուցված ցցաշեն բնակատեղիներում: 

   Չամանի սերմը հնագույն համեմունք է: Այն  աճում է նաև Հնդկաստանում, Հայաստանում, որի սերմերն օգտագործում են բազմազա խոհանոցներում թ՛ե ամբողջական և  թ՛ե արդեն փոշի վիճակում, որպես համեմունք: Այն ուժեղ համ ունի և պետք է օգտագործել շատ փոքր չափաբաժիններով:

      Կան տվյալներ, որ բույսը լայնորեն մշակվել է Փոքր Ասիայում Ք. Ա. 8-րդ դարում՝ հետաքրքիր է, որ այն երբեմն անվնում են Հայոց չաման կամ հայչաման:

    Բուժիչ հատկություններ ունի բույսի սերմը, պահպանման ժամկետը 3 տարի է: Պարունակում է մոտ 20 % ճարպային յուղ, 23 % սպիտակուց, 8 % եթերային յուղ, պիգմենտներ, ֆլավոններ, դաբաղանյութեր, հանքային աղեր, խեժանյութ: Լավացնում է ախորժակը, մարսողությունը, կանխարգելում և հանում է հարթ մկանների սպազմները, ունի խորխաբեր հատկություն, մաքրում է լորձը, կարգավորում միզարտադրությունը:

    Օգտագործում են գազերի կուտակման, դիսպեպսիայի, էնտերիտի, խոլեցիստիտի, մետեորիզմի և կոլիտի դեպքում: Ժողովրդական բժշկության մեջ խորհուրդ է տրվում այն օգտագործել որպես լակտացիան լավացնող, բրոնխները լայնացնող խորխաբեր միջոց:  

Չամանը երեք անգամ արագացնում է նիհարելու գործընթացը: Սննդաբանները նշում են, որ ճաշատեսակների մեջ չամանի օգտագործումն ավելորդ քաշից ազատվելու հեշտ միջոց է: 

      Այն առաջին հերթին արագացնում է նյութափոխանակությունը, ինչպես նաև օգնում է ազատվել խոլեստերինից:

   Չամանը որպես համեմունք կարելի է օգտագործել ցանկացած ճաշատեսակի մեջ օրական շուրջ 3-5 գրամ:

ՀԱՄԵՄԻ ՍԵՐՄԵՐ

         Ինչպես խոստացել էի միասին սկսում ենք բացահայտել հնդկական խոհանոցը:

        Գրեթե բոլորիս միշտ հետաքրքրել է հնդկական խոհանոցը իր յուրահատուկ բույրով ու համով:

    Բոլոր երկրներում մարդիկ խոսում են հնդկական ճաշատեսակների, հնդկական համեմունքների մասին՝ յուրահատուկ համ ու հոտ, որ բնորոշ է միայն այս խոհանոցին: Եվ այսպիսով սկսում ենք ճանաչել համեմունքները առանձին-առանձին:

Համեմունքների փունջ

     Այսօր կխոսենք համեմի սերմերի մասին, որը շատ են օգտագործում հնդկական խոհանոցում: Այն ընդգրկված է ավելի քան 16 երկրների դեղաբանական ցանկերում:

Համեմի սերմեր

      Համեմի համ ու հոտ սիրողները այն օգտագործում են աղցանների և ճաշատեսակների մեջ՝ չիմանալով, որ այս խոտաբույսը շատ օգտակար ու բուժիչ հատկություններ ունի: Առավել օգտակար է սերմը, որն ունի լեղամուղ, հակաթութքային, ցավազրկող, վերքերն ամոքող, մարսողությունը կարգավորորղ և այլ հատկություններ:

    Համեմի սերմի օգտակարության մասին ավելին կարող եք կարդալ սեղմելով ներքևի հղումը:

      Հղում.

http://168.am/2014/05/06/361781.html

          Միշտ բարեկամների, ընկերների, գործընկերների, հեռու- մոտիկ ծանոթների հետ հանդիպելիս զրուցել ենք Հնդկաստանի, հնդկական մշակույթի, ճաշատեսակների, համեմունքների, զարդերի, պարերի, ազգային տոների, բազմաթիվ կրոնական ուղղությունների առկայության  և այլնի մասին:
         Վերջերս զրուցում էի ընկերներիցս մեկի՝ Էմմա Միրզաբեկյանի հետ և  կրկին անգամ Հնդկաստանի թեման չշրջանցեց մեզ: Զրույցի ընթացքում Էմման ինձ ասաց. <<Ինչՙ՚ու  չես մի բլոգ բացում Հնդկաստանի մասին: Այնտեղ կներկայացնես քո տեսանկյունը, քո նկարները, բավականին ինֆորմացիա ունես Հնդկաստանի մասին և հիմա ապրում ես Հնդկաստանի՝ մեր հայկական հայտնի գաղթօջախ Մադրասում: Կարող ես բավականին հետաքրքիր նյութեր գրել>>:
        Երկար  մտածելուց հետո որոշեցի բացել այն:
        Եվ այսպիսով հարգելի ընթերցողներ միասին ճամփորդելու ենք Հնդկաստանի գեղատեսլի վայրերով, բացահայտելու ենք հնդկական ճաշատեսակների, համեմունքների գաղտնիքները, միասին սովորելու ենք պատրաստել հնդկական կերակուրներ և վայելելու ենք հնդկական մշակույթի բազմազան գույները:
Շնորհակալություն