ԱՀԱ ԹԵ ԻՆՉՊԵՍ ԵՆ ԳՈՐԾՈՒՄ ՀՆԴԿԱԿԱՆ ՄԵՏԱՔՍԵ ՍԱՐԻՆԵՐԸ

 

    Մետաքսե գործվածքները պատրաստում են բնական  մետաքսից կամ քիմիական մանրաթելերից: Դրանք Չինաստանում պատրաստվել են դեռևս մ.թ.ա. III հազարամյակում:

Հնդկական մետաքսե սարիներ

    Միջին Ասիայում, Իրանում, Կովկասում և Բյուզանդիայում մետաքսագործությունը հայտնի է դարձել V-VII դարերում: Վաճառքի նպատակով մետաքսե գործվածքները Չինաստանից տարվել են Առաջավոր Ասիա, ապա՝ Եվրոպա, իսկ ճանապարհը, որով տեղափոխվել է մետաքսը, կոչվել է <<Մետաքսի ճանապարհ>>:

     
       Այն անցել է նաև Հայաստանով և գործել մ.թ.ա. II դարից մինչև մ. թ. XVI դարը:
   Հին Հայաստանում նույնպես մշակել են բնական մետաքս, որից պատրաստված մետաքսաթելն ու մետաքսե գործվածքները եղել են գեղեցիկ, նուրբ և փափուկ: 

      Մետաքսե գործվածքներն աչքի են ընկնում իրենց գեղեցիկ զարդանախշերով՝դրանք գործվում են որպես վարագույրներ, սփռոցներ, շալեր, զգեստներ, եկեղեցական հարդարանքներ: Բարձր գեղարվեստականությամբ աչքի են ընկել եգիպտական, չինական (հատկապես մետաքսե), ճապոնական, հնդկական, իրանական (մետաքսե և <<ոսկե>>), բյուզանդական, արաբական (ատլաս), իտալական, ֆրանսիական և հայկական նախշազարդ գործվածքները:

Հարյուր գույնի թելերով գործված սարի և Հարավային Հնդկական սարի

        Ձեռքի մանածագործական հաստոցը ստեղծվել է դեռևս մ.թ.ա. V հազարամյակում:

     Գեղեցիկ մետաքսե հնդկական գործվածքների փայլն ու նրբությունը դարեր շարունակ բազմաթիվ առևտրականների  բերել է Հնդկաստան:

Մանածագործական հաստոց

             Մի քանի օր առաջ Չեննայիի /Մադրասի/ խանութներից մեկում նկատեցի ինձ անծանոթ մի հաստոց: Ներս գնալով խանութ հասկացա, որ հնդկական մետաքսե սարիների խանութում եմ, իսկ հաստոցը՝ մետաքսե սարիներ գործելու համար է:

               Խանութի սեփականատերը ոչ միայն թույլատրեց նկարներ անել, այլ նաև հրավիրեց  խանութի ամենալավ մասնագետին, ով բոլորին ներկայացրեց, թե ինչպես են գործում մետաքսե գործվածքները:

  Ասեմ, որ բավականին բարդ աշխատանք է, որը թելերի հետ աշխատելու ժամանակ պահանջում է ուշադրություն և նրբություն :

  Վերևում դրված են այն նախշերը, որոնց օգնությամբ թելերի հետ աշխատանքը տալիս է այն գեղեցիկ նախշը, որը երևում է գործված մասում: Այս սարին գործելու համար օգտագործում են կապույտ, ոսկեգույն  և կանաչ գույները: Այն  մի կողմից լինելու է կապույտ, մյուս կողմից կանաչ գույնի:

   Խանութի համապատասխան մասնագետի ուղեկցությամբ  կազմակերպվեց փոքր էքսկուրսիա ինձ համար: Նա ցույց տվեց տարբեր սարիներ՝ ըստ տարածքի /Հարավային Հնդկաստան, Հյուսային Հնդկաստան, Արևելյան Հնդկաստան և Արևմտյան Հնդկաստան/սարիներ, նախշերի և գույնների, որոնց մեջ կային նաև   100 և 1000 գույններով գործված սարիներ:

Ասեղ, որի մեջ տեղադրված են մետաքսե թելերը

Այս ասեղի օգնությամբ է գործվում  մետաքսե գործվածքը:             

Ինչպե՞ս հագնել հնդկական սարի:  Պատասխանը գտնելու համար նայել կցված նյութը:

ՀՆԴԿԱՍՏԱՆԻ ՀԱՆՐԱՊԵՏՈՒԹՅԱՆ ՕՐԸ

   
       Ինչպես Հնդկաստանում, այնպես էլ  Հնդկաստանի Հանրապետության դեսպանությունները տարբեր երկրներում հունվարի 26-ին նշում են Հնդկաստանի Հանրապետության օրը:

Հնդկաստանի դրոշը

      Այս տոնը նշանավորվում է Հնդկաստանի Սահմանադրության ընդունմամբ՝ որով երկիրը բրիտանական իշխանությունից անցնում է հանրապետության: 200 տարի լինելով բրիտանական գաղութ՝ 1947 թվականի օգոստոսի 15-ին Հնդկաստանը դառնում է անկախ երկիր:
       1950 թվականի հունվարի 26-ին  ընդունվում է Սահմանադրությունն և  նույն օրը Հնդկաստանը հռչակվում է հանրապետություն:
      Ամեն տարի մայրաքաղաք Նոր Դելլիում նախագահական պալատից  Ռաջ Պաթհ գլխավոր պողոտայով դեպի <<Կարմիր Բերդ>> են շարժվում զինված ուժերի շքերթը, Հնդկաստանի ժողովուրդների ազգային բազմերանգ տարազներով պարային խմբերը:
     Հունվարի 26-ը համարվում է հանգստյան օր, և բոլորը ընտանիքներով դիմավորում են Հանրապետության օրը:
     Հնդկաստանի Հանրապետության օրվան նվիրված շքերթին մասնակցելու նպատակով՝ այս տարի Հնդկաստան է ժամանել Ամերիկայի Միացյալ Նահանգների նախագահ Բարաք Օբաման

ԱՄՆ նախագահ Բարաք Օբաման և Հնդկաստանի Հանրապետության վարչապետ  Նարենդրա Մոդիի

Հնդկաստանի Հանրապետության Ազգային օրհներգը

ՀԱՅԿԱԿԱՆ ՀԵՏՔԵՐՈՎ ՄԱԴՐԱՍՈՒՄ

          Այժմ բնակվում եմ Հնդկաստանի Մադրաս քաղաքում, որը մեզ հայտնի է որպես 16-18-րդ դարերում հայկական խոշորագույն գաղթօջախներից մեկը Հնդկաստանում :

Հայաստանի անվան փողոցը Մադրասում

      Ըստ Քսենոփոնի, Զենոբ Գլակի, Մովսես Խորենացու և Պրոկոպիոս Կեսարացու երկերի  մ.թ.ա. 4-5-րդ դարերից ի վեր Հնդկաստանում կան տեղեկություններ  հայ-հնդկական հարաբերությունների առկայության մասին: Իսկ որպես համայնք այն ձևավորվել է 16-րդ դարում, բնակիչները հիմնականում վաճառականներ էին, պետական և զինվորական ծառայողներ: Բնակվել են ավելի քան 20 քաղաքներում /Ագրա, Կալկաթա, Մադրաս, Բոմբեյ, Հայդարաբադ և այլն/:

Մադրասի հայկական եկեղեցու մուտքը

            Առաջինը մադրասահայերն են կազմել համայնքային կանոնադրություն՝ <<Տետրակ, որ կոչի հորդորակ>>/1783թ./, ըստ որի համայնքի բարձրագույն մարմինը Ընդհանուր ժողովն էր:
     Հնդկահայերը հիմնականում վաճառականներ, արհեստավորներ /ոսկերիչներ, դերձակներ, ասեղնագործներ, դարբիններ, զինագործներ/:

      Հնդկաստանի կյանքում առավել նշանակալի դեր են ունեցել խոշոր վաճառականները, որոնք իրականացրել են առևտուրը Իրանի, Թուրքիայի, Ռուսաստանի, Վենետիկի հետ:
Հնդկահայ համայնքը ազգայինը պահելու համար հիմնել են եկեղեցիներ:

   Հնդկաստանում կա 6 եկեղեցի և 2 մատուռ, որոնցից մեկը Մադրասի Ս. Մարիամ Աստվածածին Հայ Առաքելական եկեղեցին է, որը կառուցվել է 1772թ.՝ հայկական հինավուրց գերեզմանատան տարածքում, որը հետագայում դարձել է Շահամիրյան ընտանիքի սեփականությունը: 1712թ.-ին կառուցված հայկական մատուռին փոխարինել է եկեղեցին:
      1746թ.՝ անգլո-ֆրանսիական գաղութատիրական պատերազմի ժամանակ քանդվել է մատուռը: Եկեղեցու մուտքի մոտ արված արձանագրությունում երկու տարեթվերն էլ նշված են՝ 1772 և 1712:

Մադրասի Հայ Առաքելական եկեղեցու բակում

      Այս նոր եկեղեցին կառուցվել է Շահամիր Շահամիրյանի /Սուլթանումյան/ միջոցներով՝ իր վաղամեռ կնոջ հիշատակին:

     Շարունակելի ...

          Միշտ բարեկամների, ընկերների, գործընկերների, հեռու- մոտիկ ծանոթների հետ հանդիպելիս զրուցել ենք Հնդկաստանի, հնդկական մշակույթի, ճաշատեսակների, համեմունքների, զարդերի, պարերի, ազգային տոների, բազմաթիվ կրոնական ուղղությունների առկայության  և այլնի մասին:
         Վերջերս զրուցում էի ընկերներիցս մեկի՝ Էմմա Միրզաբեկյանի հետ և  կրկին անգամ Հնդկաստանի թեման չշրջանցեց մեզ: Զրույցի ընթացքում Էմման ինձ ասաց. <<Ինչՙ՚ու  չես մի բլոգ բացում Հնդկաստանի մասին: Այնտեղ կներկայացնես քո տեսանկյունը, քո նկարները, բավականին ինֆորմացիա ունես Հնդկաստանի մասին և հիմա ապրում ես Հնդկաստանի՝ մեր հայկական հայտնի գաղթօջախ Մադրասում: Կարող ես բավականին հետաքրքիր նյութեր գրել>>:
        Երկար  մտածելուց հետո որոշեցի բացել այն:
        Եվ այսպիսով հարգելի ընթերցողներ միասին ճամփորդելու ենք Հնդկաստանի գեղատեսլի վայրերով, բացահայտելու ենք հնդկական ճաշատեսակների, համեմունքների գաղտնիքները, միասին սովորելու ենք պատրաստել հնդկական կերակուրներ և վայելելու ենք հնդկական մշակույթի բազմազան գույները:
Շնորհակալություն